काठमाडौं । भारत र पाकिस्तानबीचको सम्बन्ध पुनः तिक्त बन्दै जाँदा पाकिस्तान प्रशासित काश्मीरमा स्थानीय बासिन्दालाई आपतकालीन तयारी गर्न आह्वान गरिएको छ । भारतसँगको वास्तविक नियन्त्रण रेखा (एलओसी) नजिक रहेका १३ वटा निर्वाचन क्षेत्रमा दुई महिनाका लागि खाद्यान्न भण्डारण गर्न निर्देशन दिइएको छ ।
यो कदम अप्रिल २२ मा भारत प्रशासित काश्मीरको पहलगाममा भएको घातक आक्रमणपछिको चासोका रूपमा आएको हो । उक्त आक्रमणमा २६ जनाको मृत्यु भएको थियो । भारतले यसको दोष पाकिस्तानलाई लगाएको छ भने इस्लामाबादले त्यस आरोपलाई अस्वीकार गरेको छ ।
पाकिस्तान प्रशासित काश्मीरका प्रधानमन्त्री चौधरी अनवर उल हकले शुक्रबार क्षेत्रीय सभामा बोल्दै आपतकालीन तयारीबारे जानकारी दिएका हुन् । उनका अनुसार, खाद्यान्न, औषधि र अन्य आधारभूत सामग्रीहरूको सुनिश्चित आपूर्तिका लागि एक अर्ब पाकिस्तानी रुपैयाँ (अन्दाजी ३५ लाख अमेरिकी डलर) बराबरको आपतकालीन कोष स्थापना गरिएको छ ।
प्रधानमन्त्री उल हकका अनुसार, एलओसीसँग सटिएको क्षेत्रमा सडक तथा पूर्वाधार मर्मतका लागि सरकारी र निजी मेसिनरीसमेत परिचालन गरिएको छ । यो तयारीले सीमा क्षेत्रमा बसोबास गर्ने नागरिकको सुरक्षालाई प्राथमिकतामा राखिएको जनाइएको छ ।
