अछाम । अछामबाट जातीय विभेदको आरोपमा प्रहरीले दुई जनालाई पक्राउ गरेको छ। पन्चदेवल विनायक नगरपालिका-४ का रमेशबहादुर शाही र देवेन्द्र शाहीलाई स्थानीय दिनेश नेपालीको जाहेरीका आधारमा प्रहरीले पक्राउ गरेको हो।
समातिएकाहरूलाई जिल्ला अदालतबाट १५ दिनको म्याद थप भएर अनुसन्धान थालिएको प्रहरीले जनाएको छ। निवेदक नेपालीले आफूमाथि पक्राउ परेकाहरू र स्थानीय बखत शाहीलगायतले दलित भएकै कारण हातपात र दुर्व्यवहार गरेको आरोप लगाएका थिए।
नेपालीका अनुसार उनी अछाम जिल्ला अदालतमा चलिरहेको एउटा मुद्दामा साक्षी बसेका थिए । आरोपितले दलितले साक्षी बस्न नपाउने भनी धम्की दिँदै आएका छन् ।
ज्यान मुद्दाका साक्षी दिनेशलाई आरोपितले अछाम जिल्ला अदालत परिसरमा हातपात गरेको पीडितले दिएको जाहेरीमा उल्लेख छ। बखत शाही, गणेश शाहीलगायतलाई प्रहरीले पक्राउ नगरेको भन्दै पीडितको गुनासो छ।
