काठमाडौँ। बागमती प्रदेशका सहकारी तथा गरिबी निवारण मन्त्री मदुकुमार श्रेष्ठका स्वकीय सचिव रवि थापाको उपचारको क्रममा मृत्यु भएको छ ।
साथीको कोठामा अचेत अवस्थामा फेला परेका थापाको कलंकीस्थित सहिद मेमोरियल अस्पतालमा उपचारको क्रममा सोमबार राति मृत्यु भएको जिल्ला प्रहरी परिसर काठमाडौँका एसपी अपिलराज बोहोराले बताए ।
एसपी बोहोराका अनुसार धादिङको धुनीबेसी नगरपालिका–घर भएका ३६ वर्षीय थापा कलंकीस्थित साथीको कोठामा अचेत भेटिएका थिए । उनले विष सेवन गरेको प्रारम्भिक अनुसन्धानले देखाएको छ । पाष्टमार्टपछि मात्रै थप जानकारी हुने एसपी बोहोराले बताए ।
धादिङको धुनीबेसी नगरपालिका-८ घर भई काठमाडौँ महानगरपालिका–१४ लिगमार्गस्थित कलंकीमा कोठा लिएर बसेका शिव कुँवरको कोठामा उनी अचेत भेटिएका हुन् ।
उनलाई उपचारका लागि सहिद मेमोरियल अस्पताल लगिएको थियो । उपचारको क्रममा अस्पतालमै उनको मृत्यु भएको एसपी बोहोराले बताए । प्रहरीका अनुसार घटनाबारे थप अनुसन्धान भइरहेको छ ।
