बारा । मधेश प्रदेशका मुख्यमन्त्री सतिश कुमार सिंहले शुक्रबार बाराको निजगढमा रहेका नौ वटा स्वास्थ्य संस्थाहरुको अनुगमन गर्नु भएको छ ।
अनुगमन भएका नौ वटा स्वास्थ्य संस्थाहरुको अनुमति नभएकोले सबै स्वास्थ्य संस्था बन्द गर्न निर्देशन दिएको स्वास्थ्य तथा जनसंख्या मन्त्रालय मधेश प्रदेशका जनस्वास्थ्य अधिकृत सन्तोष कुमार ठाकुरले बताउनु भएको छ ।
अनुगमन टोलीका सदस्य समेत रहेका जनस्वास्थ्य अधिकृत ठाकुरका अनुसार अहिलेसम्म फार्मेसी बन्द गर्ने नीति नभए पनि फार्मेसी खोलेर अस्पताल सञ्चालन गरेको पाइएपछि फार्मेसी पनि पहिलो पटक बन्द गरिएको छ ।
शुक्रबार अनुगमन गरी बन्द गरिएका स्वास्थ्य संस्थाहरुमा निजगढ सिटि अस्पताल र जीवनदान हस्पिटल प्रा.लि. गरी दुई अस्पताल रहेका छन् । त्यस्तै अनुमति नभएका निजगढ डेन्टल क्लिनिक र नारायणी दन्त सेवा केन्द्र पनि बन्द भएका छन् ।
त्यस्तै मिश्रा मेडिकल सेन्टर, सम्माम फार्मेसी, मोहम्मदी मेडिसिन सेन्टर र सिद्धार्थ मेडिकल हल गरी चार फार्मेसी समेत अनुमति नभएकोले बन्द गरिएको ठाकुरले बताउनु भयो ।
निजगढ आँखा उपचार केन्द्रको पनि अनुमति नभएकोले बन्द गरिएको उहाँले बताउनु भएको छ । ठाकुरका अनुसार मधेश प्रदेशभरी अहिलेसम्म १ सय ६९ अनुगमन भएका मध्ये मापदण्ड पुगेका १८ वटा रहेका छन् । त्यसमध्ये बन्द गर्न निर्देशन दिएका १ सय २२ वटा रहेका छन् ।
