अस्ट्रेलियाको पूर्वी तटीय क्षेत्रमा आँधीले तहसनहस पारेको छ । शनिबार साँझ क्विन्सल्यान्डको राजधानी ब्रिस्बेनमा अल्फ्रेड नामको आँधी ठोक्किएपछि त्यसले जनधनको क्षति गराएको हो ।
आँधीपछि बाढी आउने क्रम जारी रहेको छ अन्तर्राष्ट्रिय सञ्चार माध्यमले जनाएको छ । बाढीमा एक जनाको शव फेला परेको छ अस्ट्रेलियन प्रहरीले जनाएको छ । खोजी अभियानका क्रममा शुक्रबारदेखि बेपत्ता रहेका ६१ वर्षीय पुरुषको शव फेला परेको हो ।
आँधी आएको क्षेत्रका ३ लाखभन्दा बढी घरमा बिजुली अवरुद्ध भएको छ । तीव्र हावाका कारण रूख भाँचिएका छन् भने बिजुलीका तार चुँडिएका छन् । सडकमा बाढीको पानी जमेको छ । आँधीको खतरा अझै टरिनसकेकाले स्थानीय बासिन्दालाई घरभित्रै बस्न र सतर्क रहन अधिकारीहरूले चेतावनी दिएका छन् ।
आँधी मत्थर भएर अहिले वर्षामा परिणत भएको छ । अल्फ्रेड आँधीले नेपालीहरूको समेत उल्लेख्य बसोबास रहेको ब्रिसबेनमा असर पुर्याउने पूर्वानुमान गरिएको समाचारमा उल्लेख छ ।
अस्ट्रेलियाका प्रधानमन्त्री एन्थनी अल्बनेजीले गोल्ड कोस्ट भनिने तटीय क्षेत्रमा ‘सबैभन्दा खराब अवस्था आउन बाँकी नै रहेको’ भन्दै सुरक्षाका सम्भावित सबै उपाय अवलम्बन गर्न नागरिक र उद्धारकर्ताहरूलाई निर्देशन दिएका छन् ।
