काठमाडौं । प्रहरीले आकर्षक तलबमा वैदेशिक रोजगारीमा पोल्याण्ड पठाइदिन्छु भन्दै रकम ठगी गरेको अभियोगमा दुई जनालाई पक्राउ गरेको छ । सप्तरी विष्णुपुर गाउँपालिका–७ का ३१ वर्षीय कृष्ण यदुवंशी र गोरखाका ३७ वर्षीय राजेश बरामलाई मंगलबार पक्राउ गरिएको केन्द्रीय प्रहरी समाचारकक्षले जानकारी दिएको छ ।
अभियुक्त कृष्णले पोल्याण्ड पठाइदिन्छु भन्दै विभिन्न पीडितबाट ७२ लाख ४८ हजार एक सय ५० र राजेशले आठ लाख ९० हजार लिएर सम्पर्कविहीन भएको खुलेको प्रहरीले जानकारी दिएको छ ।
पीडितको उजुरीपछि काठमाण्डु उपत्यका अपराध अनुसन्धान कार्यालयबाट खटिएको प्रहरी टोलीले कृष्णलाई काठमाडौँ महानगरपालिका–३१ बाट र राजेशलाई काठमाण्डुको टेकुबाट पक्राउ गरीएको प्रहरीले जानकारी दिएको छ । उनीहरूलाई कारबाहीका लागि जिल्ला प्रहरी परिसर पठाइएको पनि प्रहरीले जानकारी दिएको छ ।
