काठमाडौं । पार्टी एकता राष्ट्रिय अभियानका अध्यक्ष वामदेव गौतम एमालेमा समाहित हुने भएपछि सो अभियानका चार नेताले उनको साथ छाडेका छन् । केही समयअघिसम्म नेकपा एकीकृत समाजवादीमा जाने तयारीमा रहेका गौतम एमालेमा जाने निश्चित भएको छ ।
वामदेव एमाले फर्कने भएपछि भएपछि उनको अभियानका केन्द्रीय सदस्यहरु महेन्द्र अर्याल, हरि काफ्ले, इन्द्र सुब्बा र डिल्लीराज भट्टले उनको साथ छाडेका छन् । उनीहरु एकीकृत समाजवादीसँग एकता गर्नुपर्ने पक्षमा थिए । चार नेताले आफूहरु अभियानबाट अलग भएको घोषणा गरेका छन् ।
गौतम केही दिनभित्रै एमालेमा समाहित हुने उनीनिकट पत्रकार विश्वमणि सुवेदीले बताए । प्रधानमन्त्रीसमेत रहेका एमाले अध्यक्ष केपी ओली गौतमबीच दुई/तीन चरणमा कुराकानी भएको छ । पछिल्लोपटक उनीहरुबीच शुक्रबार बालुवाटारमा भेटवार्ता भएको थियो । दुई नेताबीच आइतबार फोन वार्ता भएको नेताहरुले बताएका छन् ।
