काठमाडौं । माओवादी केन्द्र सम्बद्ध विद्यार्थी संगठन अखिल क्रान्तिकारीको अध्यक्षमा विजयप्रकाश सापकोटा विजयी भएका छन् । निकटतम प्रतिद्वन्द्वी हेमन्त राईलाई ७१ मतले पराजित गर्दै सापकोटा विजयी भएको निर्वाचन समितिले जनाएको छ ।
निर्वाचन समिति संयोजक वरिष्ठ अधिवक्ता मुक्तिनारायण प्रधानका अुनसार सापकोटाले ६ सय ८६ र राईले ६ सय १५ मत पाएका छन् । मतपत्रमा प्रयोग भएको कालो मसीलाई मान्यता दिने कि नदिने भन्ने विवादका कारण रोकिएको मतगणना बुधबार पार्टी केन्द्रीय कार्यालय कोटेश्वर पेरिसडाँडामा भएको हो ।
अध्यक्षमा निर्वाचित सापकोटा माओवादी उपमहासचिव शक्ति बस्नेतनिकट हुन् । राई अर्का उपमहासचिव जनार्दन शर्मानिकट मानिन्छन् । क्रान्तिकारीको महासचिवमा शर्मानिकट रोशन थापामगर विजयी भएका छन् । उनले शक्ति बस्नेतनिकट सञ्जयकुमार महतोलाई पराजित गरेका हुन् ।
